Na mafai ona auai atu le sui o le Radio Samoa i le faletusi o le Tōia Library i Otāhuhu, ua saunia ai e le afioga ia Tāuanu’u Nick Bakulich ma sui o le Komiti Faafoe o le Puleganuu a Mangere-Otāhuhu se laulau o loo faatulaga ai se tusi ina ia agai atu le mamalu o le atunuu e saini ma tusi ai a latou sa’afiafiga ma valevalealofa mo le afioga i le alii faipule, Faanānā Efeso Collins aemaise le aiga faavauvau.
Sa tusi ai foi ma momoli e le susuga ia Tiatia Failautusi Tiatia ona sa’afiafiga e ala i le saini i le Api ua saunia mo lea faamoemoe.
O le vaiaso na tea nei na maliu faafuasei ai le afioga a Faanānā Efeso Collins i le mae’a ai o se tasi o sailiga seleni e fesoasoani ai i fanauiti o le Pasefika (ChildFund Water Run) i Britomart i le aai o Aukilani.
O le aso a taeao o le a faatautaia ai i le Due Drop Events Centre i Manukau se sauniga aloaia e faamavae atu ai i le afioga i le alii Faipule.
