O le Aso Toonai nei le vaega lua o le taamilosaga lakapi o le Ipu a le Ta’ita’ifono le Chairman’s Cup i le faagasologa o taaloga a le pulega o le Lakapi Samoa.
O le mae’a o le vaega muamua le Round One i le vaiaso ua mavae, ua tulaga muamua ai le ‘au a Apia i le Pool A ae o le ‘au a A’ana o loo saofa’i i le tulaga muamua i le Pool B.
O le faai’uga o lenei vaiaso o le a toe finau ai ‘au o loo tausinio i ni avanoa e sao atu ai i semi finals ae o taaloga o le Aso Toonai nei ua faatulaga mai ai o le ‘au a A’ana o le a taaalo ma le ‘au a Palauli ma Satupa’itea, Falealili o le a fetaui ma le Itu o Tane, Faasaleleaga o le a taaalo ma A’ana West, Siumu e fetaui ma Safata, ae o le ‘au a Apia o le a taaalo ma Aleipata.
O taaloga uma o le taamilosaga o loo faagasolo i le malae numela tasi i Tuanaimato i le nofoaga o iai le malae taalo faavaomalo le Faleata Sports Complex.
O le valu i le taeao e amata ai taaloga o lea taamilosaga lakapi.
