Ua fa’ailoa e le Pulega o le ta’aloga netipolo i Samoa le filifilia ai o le faia’oga ulu fou mo le ‘au netipolo a tama’ita’i o le atunu’u le Tifaimoana a’o tapena ai i le Ipu o le Lalolagi i le tausaga fou 2027.

O le tama’ita’i o Tia Winikerei ua avea nei ma faia’oga ulu o le Tifaimoana ma o se tama’ita’i ua tele lona silafia i le tulaga o loo iai le ‘au netipolo a tama’ita’i o le atunu’u ona sa lotolotoi ai i nisi o ta’amilosaga fa’avaomalo ua mae’a.

O le aso 7 ma le aso 14 o le masina fou o Novema e faia ai ta’aloga e fili ai se ‘au a le Tifaimoana mo tapenaga o le ipu o le lalolagi ma o Niu Sila ma Ausetalia o le a faia ai ia ta’aloga e filifilia ai se ‘au a le atunu’u.

O loo iai nisi o ta’amilosaga fa’avaomalo o loo sauniuni iai e pei o le SingLife Nations Cup Tournament i Singapore i le tausaga nei ma le PacificAus Netball Series ia Mati o le tausaga fou.