Ua sefuluono nei tausaga talu ona fa’avae e le malo se tasi o ana auaunaga tuma’oti e teu fa’afaigaluega ai tupe a le atunu’u, le Fa’alapotopotoga o Mavaega Tausi a Samoa poo le Unit Trust of Samoa lea e silafia e le toatele i lona ta’uga faapu’upu’u o le UTOS.
O le auaunaga a lea fa’alapotopotoga i le pasefika i lona lotolotoi i faiga fa’apisinisi tau tupe ua amanaia ai i le fa’ailoga taualoa mai le South Pacific Stock Exchange le SPX, ma ose taimi muamua lea ua maua ai ese auaunaga e pei o le UTOS a Samoa lea fa’ailoga tauāloa poo se award, i fafo atu o le atunu’u o Fiti.


O le Pule Sili o le Fa’alapotopotoga o Mavaega Tausi a Samoa le tama’ita’i le tofa Malaeulu Aysha Rimoni na malaga i Fiti e talia le fa’ailoga. Ua fa’aalia ai e le fa’alapotopotoga o le naunauta’iga ia fa’agalue tupe i totonu o le pasefika e atina’e ai atunu’u ae maua ai tupe fa’asili e agava’a iai o tatou tagata aemaise o le ‘aufai iunite.
Ua fa’afetaia ai e le pulega o le fa’alapotopotoga le lagolago a le atunu’u, o ekalesia, pisinisi ma le malo ua mafai ai ona ausia e le UTOS se isi matāti’a i lana tautua e ala i le fa’ailoga tauāloa ua amana’ia ai lana auaunaga.
Comments
Loading comments…