I le 19 lenei o tausaga talu ona tu’umālō le susuga Malietoa Tanumafili II ina ua afu lona soifua i le tofiga o le Ao o le Malo o Samoa, o lea ua fa’ailoa lautele e le Ofisa o Tausi Mavaega le Public Trust le faia o se fa’atautu’i e fa’atau atu ai i le atunu’u nisi o meatōtino ma aseta o loo i le maota i Fa’atoialemanū sa afio ai le afioga i le Tapa’au Fa’asisina.

O le Aso Lulu le ogatotonu o lenei vaiaso ua matala ai faitoto’a o le Ofisa Tausi mavaega mo le lresitalaina o suafa o tagata e fia auai i le fa’atau-tu’i poo le auction ae tāpunia lea avanoa i le Aso Faraile o le vaiaso nei lava.

Public Trust Office
Public Trust Office
Public Trust Office

E 58 meatōtino o loo lisi mai e faia iai le fa’atautu’i ma ua aofia ai nisi o meaafale ma meatōtino e pei o se ipu poo se trophy a se tasi o tamali’i o le atunu’u ua fāi’ilagi le folauga, ae sa lauiloa ai Samoa i le ta’aloga o le pi’i fa’apolofesa i Amerika le afioga Fanene Peter Maivia.

O isi aseta o le a faatau-tu’i o oloa faufale anagata e pei o maamora poo tiles e fola ai maota ma laoa. O le Aso Gafua o le vaiaso fou ua fa’amoemoe e faia ai le fa’atau-tu’i i Faatoia i le nofoaga o loo iai le maota sa susū ai le Tapa’au Fa’asisina a’o seei i le tofiga Ao mamalu o le Malo mo le 45 tausaga.