O le Aso Lulu o lenei vaiaso i Samoa ua amata ai polokalame e fa’afeiloa’i ai le toe taliu manuia i fanua o ‘au lakapi liki a ali’i ma tama’ita’i o le atunu’u, le Toa Samoa ma le Fetu Samoa ina ua mae’a le Ipu o le Lalolagi na ausia ai semi finals.
Ua tumutumu ai lumā maota o le malo i le ‘ele’ele fou e le gata o le tatou atunu’u, ae o tagata faigaluega a le malo e pei ona ave iai le fautuaga a le Komisi e pulea tagata faigaluega uma a le malo, e la’ei le lanu moana ma auai i le savali ma le sauniga i luma maota o le malo.
O le vaveao o le Aso Lulu na taunu’u ai le au malaga mulimuli o sui o au lakapi e lua ma o latou aiga ao lumana’i le polokalame ua toe fa’afeiloa’i ai e le malo ma le atunu’u. O le Aso Tofi o le a malaga ai i Savai’i au e lua e feiloa’i i le tapua’iga a le motu tele i Salafai ma o le a faia lea sauniga i Salelologa.
O le tali fa’aaloalo a le malo i se taligāsua o le afiafi i le faletalimalo o le Taumeasina Island Resort ua fa’ailoa i le polokalame o le a taua’ao ai mea’alofa mo tama ma teine o ‘au lakapi liki a le atunu’u i le afiafi o le Aso Lulu, ae o le fiafia faai’u e faia i le falemata’aga o le tusitala o Lopati Lui Sitivinisone i Vailima o le a taualuga iai i se fiafia i le afiafi o le Aso Faraile.
O loo aofia i le polokalame o le fa’afeiloa’iina o le Toa ma le Fetu Samoa asiasiga a ali’i ma tama’ita’i o ‘au lakapi liki i le nofoaga o matua tausi i Mapuifagalele, ma le nofoaga o lo’o taofia ai fanau i le maota gasegase o Tupua Tamasese Meaole i Moto’otua.
Comments
Loading comments…