Ua ta’oto nei le fa’afanua e fa’afoe ai le ta’aloga lakapi i lo tatou atunu’u ma fa’atali le iloiloga i le tulaga o loo fa’atino ai le atina’e o le ta’aloga e le pulega o le Lakapi Samoa ina ua mae’a feiloaiga a le ta’ita’i o le malo ile palemia ma le ta’ita’ifono o le lakapi i le lalolagi ma sui o le Lakapi Samoa. Ua fa’ailoa ai ise pepa o faamatalaga le fa’aauau pea o le polokalame o le atina’e o le lakapi i le tapena ai o le Manu Samoa ile Ipu o le lalolagi, faapea isi au lakapi a le atunu’u, ae ua see ane le faalapotopotoga o taaloga a Samoa le SASNOC e va’ava’aia i se tulaga fa’avaitaimi le polokalame o le lakapi le high performance rugby programmes. Ua faailoa ai foi le faia e le Lakapi Samoa o lana fa’aiuga e fa’amālōlō le tumau lona avea ma sui o le fono fa’atonu a le lakapi ile lalolagi, e fa’atali ai le mae’a o le iloiloga poo le review o le a galulue ai ni tagata o le a filifilia ise maliega a le lakapi Samoa ma le malo o Samoa. E fa’atoa toe iloilo le tulaga toe ulufale o Samoa ile fono fa’atonu poo le council a le lakapi o le lalolagi i le mae’a o le iloiloga ma maua se fa’aiuga. Ua fa’aalia ai e le pulega o le Lakapi Samoa lo latou talia ma lagolagoina le taunu’uga ua taunu’u iai feiloaiga sa faia ile vaiaso ua mavae, lea sa fa’amatai ai ma le ta’ita’ifono o le lakapi a le lalolagi se fa’aaloalo maualuga a le malo.