O le malo arapi o le United Arab Emirates poo le UAE, o se tasi o atunu’u ua fa’ailoa lana faafetai i le galuega a le To’omaga mo ē Puapuagatia o lo’o tausia ma va’aia fanau ua sauāina o loo fa’amautū i le nofoaga o le Campus of Hope i Tuanaimato.
Na afea i le vaiaso nei e le Amapasa ma ofisa sinia e to’alua o lea malo le nofoaga ma feiloa’i atu i fanau o lo’o tausia ai, o se fa’ailoga o le lagolago i taumafaiga uma e taofia ai sauaga, ona o se isi lea o manulautī o lo’o faatāua e lea malo i ana pulega e pei ona fa’ailoa i se pepa o fa’amatalaga.
O le asiasiga a le Amapasa na faia ai se foa’i tupe e fesoasoani i le tausiga o fanau ma ē o lo’o i le nofoaga, ma momoli ai ma le fa’amālō i le fa’ailoga o le Madanjeet Singh ua maua e le To’omaga mai le UNESCO.
Ua fa’aalia e le sui o lea malo i sui o le fa’alapotopotoga o le a mulimuli pea e mataitū a latou galuega lelei o loo faia ma aumai lana lagolago, e pei ona amana’ia le Toomaga mo ē Puapuagatia i fesoasoani a isi malo e pei o Ausetalia, Iapani, Peretania ma Malo Aufa’atasi.
Sa fa’atino e fanau o loo i le nofoaga o le Campus of Hope lo latou fiafia i le asiasiga a le Amapasa o lea malo e ala ia latou pese ma fa’afiafiaga.
Comments
Loading comments…