Ua toe o le fiafia i le afiafi o le Aso Faraile le faa’iuga o lenei vaiaso e faia i le fale mata’aga o le Tusitala o Lopati Lui Sitivinisone i Vailima e taualuga iai polokalame a lo tatou malo ma le atunu’u i le tali fa’aaloalo i le toe taliu manuia i fanua o ana au lakapi liki a ali’i ma tama’ita’i le Toa ma le Fetu Samoa, ona tu’ua lea o le atunu’u.

Ae o le fa’aafe a le malo i le taligasua o le aoauli i le Aso Lulu na amata ai polokalame na taua’ao ai meaalofa tupe ua saunia e le malo mo tama ma teine o au lakapi liki e lua, lea e ta’i 5 afe tālā Samoa a le tama o le Toa ma le tam’ita’i o le Fetu Samoa. O faiaoga ulu foi o ‘au e lua e ta’i lima afe tala meaalofa tupe ae o sui o le au galulue mo au lakapi liki e lua e ta’i afe lima selau tala a le tagata e to’atasi.

Se vaega o le saunoaga a le ta’ita’i o le malo le afioga i le palemia susuga, Laaulialemalietoa Leuatea Polataivao Fosi Schmidt ma lana fa’amanuia po’o le toast. O le Aso Tofi na malaga ai i Savaii au lakapi liki a le atunu’u lea na molimauina i ata ma fa’asalalauga mai Salafai le lolofi atu o le atunu’u i Salafai e feiloa’i i le Toa ma le Fetu Samoa, ae e to’afā tama o le Toa Samoa na tuai i le uafu lē maua le malaga na usu seu ai le latou aumalaga atoa i Savai’i, ae sa molimauina le malaga i se va’a alia mai Manono e momoli i Salelologa.

O le faletalimalo o le Amoa Resort na faia ai le taumafataga o le aoauli mo le aumalaga a le Toa ma le Fetu Samoa ao lei toe taliu mai i Apia mo le vaega faai’u o polokalame o le tali fa’aaloalo a le malo ma Samoa ina ua mae’a le ta’amilosaga o le ipu o le lalolagi ile lakapi liki.