A’o mata’itū ai i aso uma e le pulega o le suāvai i Samoa le tulaga i lana auaunaga masani mo le atunu’u atoa ao feagai le atunu’u ma mugāla ae itiiti timuga e maua, ua fa’ailoa e le pulega i ana fa’amaumauga lata mai i le Aso Lulu, e 3 nofoaga e maua ai le suāvai ua matuiā a’afiaga ona ua leai se suāvai, ae 6 nofoaga apovai ua tu’uitiitia le suāvai maua.

O le atunu’u atoa e pei ona fa’ailoa i ia fa’amaumauga o le 79 pasene o loo lelei le suāvai maua. O lo’o fai ma motusia lea auaunaga i nisi o nu’u ma afio’aga e mafua o galuega o loo fa’aleleia ai nisi o ofe paipa autū ua mamā ma alu maumau ai le suavai, ma o le tasi lea o fa’afitauli ma o lo’o fautuaina ai tagata uma e logo le pulega o le suavai pe a silafia ni nofoaga o tulai mai ai ia fa’aletonu.

I le motu o Savaiʻi ua naʻo nuʻu ma afio’aga i le itu i sisifo i le tau faʻasiusiʻuga o loʻo i ai nuʻu e pei o Neiafu, Tufutafoe, Falealupo, Papa ma Sataua, o Fagasa, Vaisala, Auala ma Asau o loʻo maua le suavai ae o loʻo mataʻitu nofoaga apovai ma punāvai.

Ae i Upolu e 21 nu’u ma pitonu’u ua tu’uitiitia le suavai maua ma o nisi taimi ua vaivai le suavai a’o nisi taimi ua motusia. O nisi o fautuaga o loo ave ile atunuu o le taofia o le soona faaaoga le tatau o le suavai i isi manaoga e pei o lefufulu o taavale, fui o laau ma le pefu. O le atunu’u tuaoi o Fiti o le Aso Lulu o lenei vaiaso na fa’ailoa ai e lea malo le iai o le atunu’u atoa i tulaga o fa’alavelave fa’afuasei ona ua feololo nofoaga ua le maua se suāvai e tagata e mafua i le malosi o mugāla ona o le Elenino.

I Samoa e tusa o fa’amaumauga a le pulega o le suavai e 941 ana pa’aga ua matuiā a’afiaga ua feagai ma i latou ona ua fa’aletonu le suavai maua, ae 6,219 pa’aga poo customers ua mata’itū lo latou suavai maua.