Ua fa’atonuina e le fa’amasinoga le resitala e sa’ili se loia e tula’i mo se faifeau o le ekalesia New Testament o lo’o faagaioia ise afio’aga i Upolu, ona e matuiā solitulafono o loo molia ai lea e o’o le maualuga o le fa’asalaga i le falepuipui i le 14 tausaga.

E to’atolu ni fanau teine lāiti o lo’o a’afia i solitulafono na faia e lē ua molia lea ua ia ioeina uma le sefulutasi o moliaga.

E lē gafatia e le faifeau ona totogi se loia le mafua’aga o le poloa’iga e sa’ili e le fa’amasinoga se loia e tula’i mo lē ua molia e tapena atu ai ni folasaga fa’aletulafono ma se lipoti mai le ofisa fa’anofo va’ava’aia mo le iloiloina o se fa’asalaga talafeagai.

Sa taofia lē ua molia ae na tatala i tua i le Aso Gafua ma le aiaiga e tu’uina atu lona tusifolau e taofia e le fa’amasinoga, saini i le ofisa o leoleo i Faleata ma tapu ona latalata iai latou na a’afia aemaise o le nofoaga na fa’atino ai le solitulafono.

O le Aso Gafua o le vaiaso asau e toe tula’i ai lē ua molia i le fa’amasinoga mo le isi vala’auga o ona moliaga o le a fa’amautū ai se aso e lau ai se faai’uga i se fa’asalaga.