Ua sefulufā nei tausaga talu ona iai le ma’a fa’amanatu i Mulinu’u ua manatua ai le auva’a ma le pasese a le va’a o le MV Joyita na tu’ua Samoa i le aso 3 o Oketopa o le tausaga e 1955 i le faamoemoe e malaga i le motu o Fakaofo i Tokelau, ae oo mai i le aso e lei maua se isi o le auva’a ma le pasese.

Ua na o le va’a na maua i se vaega o ogāsami o le atunu’u o Fiti o lo’o tafea iai ae aunoa ma se tagata o le pasese e toa’iva ma le auva’a e to’asefulu ono o iai. O le Aso Lua o le vaiaso nei le aso 10 o Novema na atoa iai le 71 tausaga talu ona maua na o le va’a, ma o le aofa’iga foi lea o tausaga talu ona tupu lea fa’alavelave ma ua fa’amauina ai le maliliu uma o le toa luasefululima na malaga ai.

O se tasi lea o misitelio lilo e oo mai i le taimi nei e lei mautū i sā’ili’iliga ma su’esu’ega po’o le a tonu le mea na tupu. O nisi o le pasese o se tagata faigaluega mai le Auaunaga o le Soifua Mālōlōina i Samoa, o se tagata faigaluega o le Soifua Mālōlōina i Fakaofo, ma nisi o tagatanu’u o Tokelau.

O le auva’a sa malaga ai o se tagatanu’u o Amerika, o tagatanu’u o Kilipati, Samoa, Tokelau ma Niu Sila. Sa ave ai i le vaa ma se uta o oloa ‘ese’ese e aofia ai ma taumafa.