Sa fa’atalitali le atunu’u i se tala pe malaga mai ana ‘au lakapi liki o le Toa Samoa ma le Fetu Samoa se’i feiloa’i iai ma momoli le fa’afetai i taumafaiga sa feagai ai i le ta’amilosaga o le ipu o le lalolagi, peita’i o lea ua fa’amautū mai e le Pulega o le Ta’aloga Lakapi Liki a Samoa, o le Aso Lua aga’i i le vaveao o le Aso Lulu o le vaiaso nei e taunu’u ai le Toa ma le Fetu Samoa.

O se taimi ona fa’ailoa lautele lea o le polokalame o se tali a le tapua’iga i le malo ma le atunu’u mo lea fuafuaga. Ae o le feiloa’iga a tusitala ma sui o le ta’aloga lakapi liki a Samoa na fa’ailoa ai e le Peresitene le tōfā Fiu Ponifasio Vasa, o le 4 miliona o le lagolago sa fa’ailoa e le malo, o le vaega tele e maua mai i sponsors poo le lagolago a pisinisi.

O le lagolago a le SIFA poo le pulega o teugātupe fa’avaomalo o se auaunaga a le malo e 1.5 miliona, 300 afe tālā mai le Pulega o Tagata Tafafao ma isi lagolago tuma’ oti ae o le paleni e maua atoa ai le 4 miliona o le sao lea o le malo.

O le feiloa’iga foi a tusitala ma sui o le lakapi liki na fa’ailoa ai e le Peresitene e lagolagoina e le Pulega o le Ta’aloga i Samoa le tu’uālalo a tama ta’aalo i le Pulega o le Lakapi Liki i le Lalolagi ina ia tutusa le faiga o tagata ta’aalo i le itu i fa’amanuiaga tau tupe.

O le Peresitene o le Fa’alapotopotoga o le Lakapi Liki i Samoa o loo avea nei ma Faipule o le palemene ma o le Minisita Lagolago o le Matagaluega o Ta’aloga ma Alaga’oa mo le Fiafa o Tagata.