O uiga o le tau ua fa’aigaoina o le Elenino lea ua mafua ai ona fa’aitiitia le maua o ni timu ae ua malosi mūgalā, ua fa’ailoa ai i se lipoti lata mai a le pulega o le suāvai le tulaga lelei o le suavai maua i le 79 pasene o le atunu’u.

Peitai e ui ina fa’ailoa lea tulaga lelei ae o loo fautuaina pea le fa’aaoga tatau o le suāvai a’o mata’itū e le pulega nisi o vaega o le atunu’u o lo’o maua le suāvai ae o loo fai ma siaki nofoaga apovai ma punāvai.

Tusa o le 9 pasene o le atunu’u o loo molimauina ai lea tulaga. O le 8 pasene o le atunu’u e pei ona fa’ailoa e le pulega ua tu’uitiitia ua vaivai le suāvai ma o nisi taimi ua motusia. O le 4 pasene o nisi vaega o Samoa ua matua a’afia le suāvai maua ma e ono vaivai pe motusia ai le suāvai.

Ua fa’ailoa mai  lea tulaga ao feagai nisi o motu o le pasefika ma fa’afitauli o le lē maua o se vai e pei ona lipotia mai i nisi o vaega o le atunu’u tuaoi o Fiti.