Maualuga le fiafia o le tapua’iga i ta’aloga a le Toa ma le Fetu Samoa 

Aso Gafua 26 Oketopa 2026

Ua tuana’i lena lua vaiaso talu ona amata faagasolo le ta’amilosaga o le Ipu o le Lalolagi i le lakapi liki, ma o loo tumau pea le fa’afiafiaina o le tapua’iga a Samoa aoao, e lē gata i lo tatou atunu’u a’o itu e fia o le lalolagi.

E pei ona maimoaina i le fa’aiuga o lena vaiaso le toe manumalo o le Toa Samoa i lana ta’aloga lona lua sa fetaui ai ma Papua Niu Kini, ae fa’apea foi i le ta’aloga a le au a tama’ita’i le Fetu Samoa na manumalo i le la ta’aloga ma Wales. O televise tetele sa maimoaina ai ia ta’aloga i luma maota o le malo i le ‘Eleele fou ma le falemeli sa fa’atumulia i le tapua’iga a le atunu’u ma sa maimoaina ai foi e le ta’ita’i o le malo ma nisi o Minisita o le Kapeneta.

O le loto ua tumu i le fiafia na fa’alogoina ai leo o pesega ma le faaumuumu ona o le manumalo o le Toa Samoa aemaise o le Fetu Samoa.

O solo a ta’avale poo parade sa matuā mata’alia le vasega o leoleo aemaise foi o pulega a ali’i ma faipule i nisi o nu’u ma afio’aga i le tapu ona faia o lea tulaga ona o puipuiga o le saogalemū.

Ua toe sauni le tapua’iga a Samoa i le ta’aloga a le Toa Samoa ma le ‘au a Tonga i le fa’aiuga o lenei vaiaso faapea le ta’aloga a le Fetu Samoa ma Egelani ma e faia uma ia ta’aloga i Ausetalia.