Ua fa’ailoa nei e le malo ina ua fa’amaonia le i’ugafono a le Kapeneta e fa’atino i le masina faai’u o lenei tausaga le ulua’i polokalame ua fa’aigoaina o le Kerisimasi Fiafia mo aiga ma tagata uma o Samoa, ma le fa’amoemoe o le a fa’aauau pea le polokalame i tausaga ta’itasi.

O le autū o le Kerisimasi Fiafia o le maua o le fealofani ma le fetausia’i i le agaga maualuga o le malo e pei ona fa’ailoa i se pepa o fa’asalalauga, ia toe aumai le agaga moni o le Kerisimasi i totonu o aiga uma o le atunu’u ma ia lagonaina le tāua o le soifua mai o le pepe o le Kerisimasi.

Ua fa’atulaga mai o le aso 12 o Tesema e amata ai le polokalame mo le umi e sefulutolu aso e mae’a i le tauafiafi o le aso 24 o Tesema a’o lumana’i le aso Kerisimasi. O le a fa’atino ai pesepesega ma fa’afiafiaga fa’aleagaga, o tauvaga o moli emoemo fa’atasi ai ma le teuteuina fa’amatagofie o ofisa faigaluega ina ia atagia ai le agaga o le Kerisimasi.

Ua fa’ailoa i le pepa o fa’asalalauga mai le Ofisa So’oupu o le malo o se avanoa mo Samoa aoao mai lava i matagaluega ma fa’alapotopotoga tuma’oti, o ofisa o fono fa’avae ma pisinisi tuma’oti e auai i le savali o le a tatala ai le polokalame.

O isi fuafuaga uma o le a fa’ailoa e le komiti o tapenaga ua ta’atia ai le fa’amaopoopoina ma le tu’ufaatasia o le polokalame o le ulua’i Kerisimasi Fiafia i Samoa.