I le silia ai nei i le 20 tausaga talu ona fa’avaeina le fa’alapotopotoga tuma’oti o le To’omaga mo ē Puapuagatia, ma fa’asolo lana galuega lavea’i o le taofia o sauaga ma titina amioga o le fa’amalie o tu’inanauga o le tino i auala solitulafono tau feusua’iga fai fa’amalosi ua osofai ai le ola mu’amu’a ma le saogalemū o fanau teine lāiti, aemaise faiga fa’amalosi ma le sauāina o tinā ma tama’ita’i, o le tala’i atu e le to’omaga o auala e taofia ai ia tulaga uma; ua amanaia ai e le fa’alapotopotoga a malo aufa’atasi le UNESCO, ma filifilia ai le To’omaga mo ē Puapuagatia e tu’uina atu iai le fa’ailoga o le Madanjeet Singh prize, o se fa’ailoga e amanaia ai galuega e fa’alauiloa ai aiā tatau o tagata soifua, o le fa’aaloalo, filemu, ma tausisi i aga tausili ma le faia o le amiotonu,  e feso’ota’i lea i le taofia o sauaga ma isi faiga solitulafono ua lamatia ai le saogalemū ma le soifua fiafia o tagata.

O le tausaga e 1995 na ulua’i tapena ai lea fa’ailoga e malo aufa’atasi ma amata tu’uina atu i le tausaga na soso’o ai 1996. O le tausaga nei i le masina o Iuni na tu’uina atu ai e le Matagaluega o Leoleo, Falepuipui ma le Toefuata’ina lana fa’atū poo le nomination i le UNESCO mo le To’omaga mo ē Puapuagatia e avea o se tasi o auaunaga tuma’oti e faia iai le filifiliga mo sē e maua le fa’ailoga.

Sa ave iai ma le lagolago a le vasega o fa’amasino sinia o le fa’amasinoga a le atunu’u fa’apea le ta’ita’i o le malo i le palemia e pei ona fa’ailoa i se tusi mai le Matagaluega o le Va i Fafo ma Fefa’atauaiga  na logoina ai le fa’alapotopotoga i lona maua o le fa’ailoga.

Fa’aalia e le Peresitene o le fa’alapotopotoga o le fa’ailoga ua manumalo ai, o le fa’ailoga mo tagata Samoa uma, ma sa lagolago ma o loo lagolago pea i lana auaunaga faifaipea i aso uma. 

Le afioga Muliagatele Siliniu Lina Chang o le Peresitene o le To’omaga mo ē Puapuagatia.

O le Aso Gafua o le vaiaso fou o le a taua’ao ai le fa’ailoga i le ofisa tutotonu o le UNESCO o loo i le aai o Pale i Farani, ma o le Peresetene o le faalapotopotoga o le To’omaga mo ē Puapuagatia o le a malaga e talia le fa’ailoga.

O loo vala’aulia ai foi le sui o le malo o Samoa mo le UNESO le tamaitai Amapasa le afioga Toleafoa Nella Levy,ma o le a saunoa ai e avea ma sui o le malo o Samoa i lea sauniga fa’apitoa. O le manumalo o le To’omaga i le fa’ailoga ua avea ai Samoa ma ulua’i atunu’u laitiiti o le lalolagi ae ua muamua foi i atunuu o le pasefika ua manumalo i lea fa’ailoga taualoa.