A’o nofo sauni le tapua’iga a Samoa i le ta’aloga i le po o le Aso Sa a le Toa Samoa ma le ‘au malosi o le Mate Ma’a Tonga i le ta’amilosaga o le Ipu o le lalolagi i le lakapi liki, o le fesili tāua o loo tulimata’i nei i le faai’uga o lea ta’aloga, poo ai o Samoa ma Tonga o le a sao atu i semifinals.

O loo tulimata’i foi i le tapua’iga a le atunu’u pe o le a toe suipi le Fetu Samoa le au lakapi liki a tama’ita’i o le atunu’u i se manumalo i le la ta’aloga ma le au lakapi liki malosi a Egelani o le a iloa ai poo ai foi e sao atu i semifinals. O le po o lenei aso Faraile i Samoa e faia ai le ta’aloga a le tatou Fetu Samoa ma Egelani ae o le po o le aso Sa le ta’aloga a le Toa Samoa ma le Mate Ma’a Tonga.

I nisi o ta’aloga i le fa’ai’uga lava o lenei vaiaso, o le aso Faraile foi e amatalia ai le taamilosaga lona tolu o le lakapi ta’ito’afitu a le lalolagi mo e logonoa o loo faia i Iapani o loo tausiniō ai le au masi’i a Samoa. O loo fa’atulaga mai ai o le au lakapi logonoa a lo tatou atunu’u o loo i le pulu A ma au mai atunu’u o Niu Sila, Aferika i saute, Fiti, Ausetalia, ma Uelese o loo umia le siamupini o lea ta’amailosaga lakapi fa’avaomalo.

E sefulufitu au o loo auai ma o le aso 30 o Oketopa e amata ai le ta’amilosaga seia mae’a i le aso 3 o le masina fou o Novema.