O le aso 7 o Tesema ua toe tolo iai le lauina o se fa’aiuga a le fa’amasinoga fa’aitumalo i se fa’asalaga o Aumaga Aloali’i, pe a taua’ao e le Fa’amasinoga se fa’amaoniga sa fa’ato’ese lē ua molia, i lē ua tagi o le afioga i le palemia, susuga Laaulialemalietoa Leuatea Polataivao Fosi Schmidt.
O le Aso Gafua o le vaiaso nei sa fa’atulaga e aumai ai se fa’asalaga o Aumaga ina ua ioe i moliaga o lona faia o se fa’amata’u i luga o upega tafā’ilagi na te faao’o le maliu i le palemia, o lona lafo o ni upu tau fa’amata’u ma le faia o upu taufaifai.
Peita’i na fesiligia e le afioga i le faamasino le afioga Leota Mata’utia Raymond Schuster lē ua molia pe ua fa’ato’ese i lē ua tagi, ae sa ia fa’ailoa o le Aso Lua o le vaiaso na te’a nei na o’o ai i le ofisa o le palemia ma faia ai lana fa’ato’esega.
Peita’i na ia fa’ailoa i le fa’amasinoga sa saunoa atu le palemia o le mataupu ua i a’ao o le tulafono. O lo’o manaomia e le afioga i le fa’amasino se fa’amaoniga na faia le fa’atoesega ae pe na talia pe leai.
E leai se fa’amaumauga a leoleo i lea tulaga le isi mafua’aga o le tolopō o le lauina o se fa’asalaga sei maua se fa’amaoniga o le fa’ato’esega ma se tali a lē e ana le tagi.
O le faia e Aumaga Aloali’i o solitulafono ua ia ioeina i sana fa’asalalauga i luga o upega tafā’ilagi na mafua ai ona fa’atino e le afioaga o Saleapaga se ifoga i le ta’ita’i o le malo.
Peita’i na fa’ailoa e le faamasino i le fofogaina o le mataupu i le Aso Gafua ua ia tauaao se tusi mai le ua tagi ua faailoa atu ai e leo le nuu na solia le tulafono ma ia faia ai ala o le tulafono.
Comments
Loading comments…