O le faao’olima o ni tama a’oga o le Iunivesite Aoao o Samoa i se isi tama a’oga i se gaioiga na tula’i mai i totonu o le lotoa a le Iunivesite i le Le Papaigalagala i se masina e lei mamao atu, ua tūtūla’i ai i e fa’amasinoga i moliaga o le faao’olima ni ali’i a’oga se to’alima, o lo’o fa’amālōlō lē tumau mai le toe ulufale i le Iunivesite Aoao a le atunu’u.
O le Aso Gafua na tūtūla’i ai i latou mo se fa’asalaga a le fa’amasinoga peita’i ua lē taunu’u lea vaega o taualumaga o le latou fa’amasinoga, ona ua tāpā le ofisa fa’anofo va’ava’aia mo se lipoti i ni a’afiaga o lē na faao’olima iai i latou ua molia.
Sa fa’ailoa ese tasi o ali’i a’oga e to’alima ua molia i le fa’amasinoga sa taumafai e feiloai i lē na a’afia mo se fa’ato’esega ae oo mai lava i le amataga o le vaiaso nei e le’i maua atu se tali i le aiga o lē na a’afia. Ua fa’atonuina ai e le fa’amasinoga le ofisa fa’anofo va’ava’aia e feagai latou ma se feso’otaiga i lē na a’afia ma lona aiga, ona faia lea o se feiloa’iga ma i latou ua molia i le ofisa fa’anofo va’ava’aia.
A mae’a ona tu’uina atu lea o se lipoti i se taunu’uga o lea feiloa’iga, a’o lei lauina le fa’asalaga i le faai’uga o le masina nei. O le faao’o’lima na tula’i mai i totonu o le lotoā o le Iunivesite na mafua ai se feiloa’iga a le ta’ita’i o le malo ma lana Kapeneta, ma le Matagaluega o Leoleo ma le Pulega o le Iunivesite fa’apea ma fanau o loo ao’oga ai, i se taumafaiga e taofia le toe tula’i mai o ia faiga solitulafono ma a’afia ai fanau a le atunu’u o loo a’oa’oina i le Le Papaigalagala.
Na faia ai ma se tiute fa’apitoa a leoleo i le nofoaga o loo iai le iunivesite ona o le fia puipui lava o le saogalemū o fanau ma taofia le toe aliali mai o nisi gaioiga solitulafono tau faao’olima.
Comments
Loading comments…