Ua mae’a tuuina atu folasaga a le loia mo le faipule filifilia o Safata 2 ua talosaga ai i le faamasinoga e taofia ma aveese pe strike out se vaega o mau tauto o loo lagolago ai nisi o vaega o le tagi o moliaga o faiga faaālatua o loo tuua’ia ai le faipule filifilia o lea itumalo palota, e māfua i ni tupe o le taui e sefulu miliona sa tuuina atu i nisi o tagata palota.
O loo finau le loia a lē o loo molia o ia vaega o mau tauto a le itu tagi o ni mau faalogo poo se hearsay evidence.
Peita’i ua tali i lea finauga le loia a lē o loo faauluina le tagi ma faamanatu i faamasino o loo tauaveina le su’esu’ega, aiaiga o le tulafono e faasino i ni mau e tuuina atu e lagolago ai ni moliaga, ona e tatau ona faaaogā pea ia mau i le taimi e su’esu’e ai le tagi autū, ona ta’oto lea i le faamasinoga e faia iai sana iloiloga pe talia.
E lē o iai ni moliaga o ni faiga faaālatua poo se counter petition a le sui faipule filifilia o Safata 2, ae o le Aso Lulu o le vaiaso a sau o le a aumai ai se faai’uga o le talosaga a le faipule e ala i lana loia e pei ona finau ai e taofi le faaaogāina o se vaega o mau a le itu o loo faauluina le tagi tau palota.
