E ui ua faiilagi le folauga a le alii iloga ma ta’uta’ua i le taaloga lakapi i Niu Sila o Jona Lomu, ae o loo manatua pea e le to’atele le sao o lea tamalii i le taaloga o le lakapi i totonu o Niu Sila, a o taalo ai mo le ‘au a le All Blacks i le tele o tausaga.
E pei foi ona faamauina le tuufaatasia ai o se ata poo se documentry ua faaigoaina “Lomu”.
O le ata na faalauiloa i le Civic Theatre i Aukilani, o se tasi o vaega o faaaliga o Ata tifaga i tulaga faavaomaloa Niu Sila poo le New Zealand International Film Festival.
Na faamauina le auai faatasi uma atu o le aiga o Jona Lomu, o uō mamae ma ē masani, aemaise o paaga ma uō na taaalo faatasi ma ia i le All Blacks e maimoa ma silasila i lea ata.
Faamanino o lenei ata, o loo aofia ai uma le tala’aga o lenei alii taalo, faapea nisi o ata ma tala’aga e le’i faaalia pe na faamatala muamua foi o le olaga o Jonah Lomu.
Faamatala e se tasi uō ma sui na taaalo faatasi ma Jonah, le alii o Kevin Mealamu, sa ta’alo, o le a fesoasoani lenei ata e faailoa ai i tupulaga talavou se tasi o sui iloga i le atina’e ma le ta’uleleia o le taaloga lakapi a Niu Sila, a o taalo ai i le All Blacks.
O loo fuafua o le a tatala lenei ata mo le maimoa lautele a le atunuu i le vaiaso o le Aso Sa o Tamā.
