E ui ua le’i matuā faamanuiaina Samoa mo pine o Taaloga a Malo o le Taupulega ae ua mātauina le mata’ina o taumafaiga a ‘au taaalo a Samoa i taaloga ta’itasi.
I le taaloga o le siisii u’amea mamafa, na toeitiiti lava a maua e le alii o Jack Opeloge le pine apamemea i le vaega a alii o le 110 kilokalama.
Na taumafai Jack e sii le mamafa e 210 kilokalama i le sii mālōlō poo le Clean and Jerk mo le pine apamemea, peita’i na pa’ū i lana taumafaiga lona lua ma lē mafai ai ona faaauau atu i lana sii mulimuli.
I le vaega a tama’ita’i e sili atu i le 86 kilokalama, na tausiniō ai Iuniarra Sipaia.
Na manuia lana sii e 100 kilokalama i le Snatch poo le sii malele, peita’i e le’i mafai ona faaauau atu e sii mo le Clean and Jerk, ma faamauina ai le Did Not Finish (DNF).
O se vaaiga mata’ina le toe foi o le siamupini o Taaloga a Malo o le Taupulega i le tausaga 2018 i lea lava taaloga, Sanele Mao, e fai ma ave fu’a o Samoa i le vaega a alii e sili atu i le 110 kilokalama, ma e ui i sona taumafai ae e le’i mafai ona faaauau (DNF).
I le taimi nei e na o le 2 pine a Samoa o loo iai i ia taaloga faavaomalo, e pei ona manumalo ai Seine Stowers i le pine auro, ma le alii o John Lautafi Tafi lea na manumalo i le pine siliva mo Samoa i le siisii u’amea mamafa.
O loo tālia nei le taaloga o le Judo lea o loo tausiniō ai le alii o Peniamina Percival ma le taaloga o le togi pulu salafalafa (discus) lea o loo tausiniō ai le alii o Alex Rose.
E mae’a Taaloga a Malo o le Taupulega i le aso 2 o Aokuso 2026.
Puna o Faamatalaga: https://www.facebook.com/share/r/1Ja5Yv51K3/
