O le aso 14 o le masina nei o Aokuso na tusi atu ai le failautusi o le ofisa o le fono aoao faitulafono le tofa Satama Leatisa Uitimē Tala i le Ofisa Sili ma le lesitala sinia o le Faamasinoga o Fanua ma Suafa e sa’ili se faamaoniga o se faai’uga a lea faamasinoga i le suafa Laaulialemalietoa o loo suafa ai le ta’ita’i o le malo le afioga i le Palemia.
Na tali iai le susuga Papalii John Taimalelagi Afelē o loo faauluulu iai le matāgaluega o faamasinoga ma faailoa i le failautusi o le fono aoao le faamaoniga, e ala i le faai’uga na faia i le aso 25 o Iuni o le tausaga na te’a nei 2025.
I lea faai’uga o loo faailoa ai le faasa’oina o le suafa matai o Leuatea Polataivao Fosi i le Laaulialemalietoa.
O lea faai’uga na māfua mai i le talosaga a Alii ma Faipule o afio’aga o Fagae’e, Sasina ma Letui, na faaulu i le faamasinoga i le masina o Mati o le tausaga ua mavae sa tatalo ai e faamaonia ma lesitala le suafa Laaulialemalietoa o loo suafa ai Leuatea Polataivao Fosi.
O le mae’a o iloiloga a le faamasinoga i mau na tuuina atu e itu auai, na faamalieina ai le faamasinoga i le talosaga a alii ma faipule ona ua talafeagai le talosaga ma le tulafono o Faamasinoga o Fanua ma Suafa o le tausaga 2020 ma teuteuga o le tulafono o fanua ma suafa o le tausaga e 2025.
O le tauaofiaga a le Palemene i le Aso Lua na saunoa ai le Fofoga Fetalai ma ave le tuualalo i le ta’ita’i o le Itu Agai le susuga Tuilaepa Lupesoliai Sailele Malielegaoi, e faatatau i lona ta’ua o le suafa Laaulialemalietoa i nisi o ana saunoaga ma faasalalauga i upega tafa’ilagi ae ua taoto le faai’uga a le Faamasinoga o Fanua ma Suafa.
Le afioga i le Fofoga Fetalai, tofa Auapaau Mulipola Aloitafua.
