A o tālia ai le su’esu’eina o moliaga o le faia o tala taufaaleaga o loo tuua’ia ai le ta’ita’i o le Itu Agai ma le Vaega Faaupufai e Puipuia Aiā Tatau a Tagata i tagi e lua ua faaulu i leoleo, o le tasi o ia matāupu o le tagi a le Minisita o A’oga ma Aganuu ma le tagi a le Palemia.
O le Aso Tofi o lenei vaiaso na toe faia ai e leoleo nisi moliaga fou se lima faasaga lava i le susuga Tuilaepa Lupesoliai Sailele Malielegaoi e māfua i se isi tagi ua faaulu e le ta’ita’i o le malo le afioga i le Palemia susuga Laaulialemalietoa Leuatea Polataivao Fosi.
Ua faamaonia mai e se ofisa sinia o le matāgaluega o faamasinoga ma le faafoeina o faamasinoga le taunuu atu o lea tagi mo le fofogaina i le Faamasinoga Faaitumalo.
O moliaga e lima e aofia ai moliaga e 4 o le faia o tala taufaaleaga ma le moliaga e tasi o le faasoesa e faaaogā ai auala o fesoota’iga faatekonolosi.
Ua māfua mai ia moliaga fou i ni saunoaga a le ta’ita’i o le Itu Agai ma le Vaega Faaupufai e Puipuia Aiā Tatau a Tagata sa aga’i i le Palemia i lana feiloa’iga masani ma tusitala i le Aso Tofi.
Ua faailoa foi le solia ai e Tuilaepa o se faatonuga a le faamasinoga i ona moliaga i tagi e lua muamua, o le taofia lea ona toe faia ni tala faasaga i le Palemia ma le Minisita o A’oga ma Aganuu, ona e le’i mae’a ona su’esu’eina mau o ia tagi e lua, ma ua taoto atu nei lea tulaga i leoleo.
Na taofia e leoleo le ta’ita’i o le Itu Agai ma toe tatala i tua i le Aso Tofi ina ua mae’a ona faia ona moliaga fou lea ua faatulaga e le faamasinoga le aso 25 o le masina nei o Aokuso e valaau ai mo le taimi muamua poo le first mention.
Faaalia e le ofisa o faamasinoga o loo tatala lē ua molia i tuutuuga e aofia ai le taofia o lona tusifolau.
