E lua fautasi o le afio’aga o Toamua, lua fautasi mai Manono e maua ai le ono o fautasi ua faamautū o Sa ia o le a sa’ili ai le siamupini o fa’agatama i le tai o le vaiaso o Measina lea e amata i le Aso Sa 30 o Aokuso, ma faasolo ai i le ulua’i vaiaso o le masina fou o Setema.
Ua faailoa e se sui o le komiti o fautasi e ono ua faamautū le auai i lea polokalame e aofia ai le Tolotolo o Tamauli mai Salelologa, Tava’esina mai Salua i Manono, Telefoni o le Vainuu mai Faleū i Manono, Littlerina mai Toamua, Aviivii mai Toamua, ma le fautasi o le afio’aga o Apia.
O le Aso Tofi le aso 4 o Setema e faia ai tu’uga fautasi ma o le a faaaogā ai foe Samoa poo foe laau.
