A o talanoaina ai e le Palemene i lenei vaiaso le tulafono toe teuteu o le Faletupe Tutotonu le Central Bank of Samoa, ua faailoa e le tama’ita’i Minisita o Tupe i felafolafoa’iga i le Aso Lulu, o se tasi o faamoemoega o le malo ua māfua ai teuteuga ua tuuina atu mo se finagalo o le fono aoao faitulafono, o le mafai ai lea e le faletupe tutotonu ona faatulaga tului o nonōgatupe o loo faia mai pisinisi nonōtupe laiti ae lē o faletupe faapisinisi poo Commercial Banks.
Faaalia e le Minisita le afioga Mulipola Anarosa Ale Molioo, o se tasi lea o mafatiaga o loo feagai nei ma le atunuu o loo aga’i i ia pisinisi nonōtupe o le maualuga o le tului poo le interest e faaopoopo i le toe totogiina o se aitalafu.
O nisi o ia auaunaga o loo nonō ai i latou o loo taumafai e atina’e ni pisinisi laiti e maua ai seleni e fesoasoani i o latou aiga e pei o faalapotopotoga a tinā i totonu o nuu ma afio’aga.
E lē o mafai e le faletupe tutotonu i aiaiga o lana tulafono o loo iai i le taimi nei ona faatonutonu ma faatulaga tului o nonōgatupe a le atunuu mai ia pisinisi nonōtupe.
