I le iva masina talu ona mae’a le taimi galue e 12 tausaga o le afioga Fuimaono Camillo Afelē i le tofiga o le Pule ma Su’etusi Sili a le malo, o lea ua mae’a ona faatauto se tasi o Su’etusi Sili sinia le susuga Faamoetauloa Faasavalu Ah Siu Lin e tauave lea tofiga faalefaavae mo le umi e 12 foi tausaga e pei ona aiaia i le tulafono faavae.
O le Aso Lua ina ua toe tauaofia le fono usu a le Palemene na faatautō ai le susuga Faamoetauloa Faasavalu Ah Siu Lin i luma o lana afioga i le Ao Mamalu o le Malo.
O lea tofiga sa tolu tausaga le umi e tauave ai e se tasi e filifilia e pei o le umi o taimi galue o faauluuluga poo Ofisa Sili o isi auaunaga a le malo.
Peita’i o le tausaga e 2013 na pasia ai e le Palemene teuteuga o le tulafono faavae ma aloa’ia ai le 12 tausaga e galue ai se tasi e tofia e avea ma Pule ma Su’etusi Sili a le malo.
O le afioga Fuimaono Camillo Afelē na ulua’i tauaveina lea tofiga i aiaiga fou o le faavae ina ua mae’a le 3 tausaga muamua sa faakonekarate ai lea tofiga, ma e mae’a lana tautua i le malo i le avea ai ma pule ma Su’etusi Sili ua 15 tausaga o ia tauave lea tofiga.
O le Pule ma le Su’etusi Sili fou ua amata galue, o loo ia umia le faailoga tau i le tulafono le LLB mai le iuunivesite a le Pasefika i Saute faapea faailoga maualuluga i tomai faatausi tusi ma su’etusi.
E filifilia nei o loo galue i le ofisa o le Su’etusi Sili a le malo, ma o loo avea ma teutupe o le faalapotopotoga o tagata tausi tusi i le atunuu le Samoa Institute of Accountants.
