Ua tuuina mai nei ni fuafuaga fou a le Malo i fesoasoani mo i latou o loo sa’ilia ni galuega poo le Jobseeker Support.
Ma ua faaalia, i suiga ua fuafua iai e ono aafia ai le tusa ma le 2,700 o tupulaga talavou mai le 18 i le 19 tausaga le matutua, o i latou o loo aafia i ni gasegase, o manu’aga faapea i latou o loo iai ni aafiaga tumau i le soifua.
Saunoa le Minisita o Agafesoota’i, Louise Upston, e amata atu ia Novema o le a lē toe agavaa tupulaga talavou i ia fesoasoani, pe afai e sili atu i le $65,000 le tupe maua e o latou mātua i le tausaga.
Faamanino e Upston, o le ‘auga o lea suiga fou, ia una’ia tupulaga e faaauau pea a’oa’oga ma sa’ili galuega, ma e tatau ona avea mātua ma fesoasoani muamua i tulaga o seleni.
Ae ua faaalia e le vaega faaupufai a le Green Party, o ia fuafuaga i lo latou iloa, o le a faateteleina ai le faaletonu o le soifua mālōlōina o le mafaufau o tupulaga talavou.
Ta’ua e le sui faipule, Ricardo Menéndez March, e lata lava i le 70% o ē aafia e iai aafiaga poo gasegase i le mafaufau (psychiatric or psychological conditions), ma o le to’atele o i latou nei e lē mafai ona faalagolago i o latou aiga mo se fesoasoani.
Ua tali le malo, o loo faatumauina pea le iai o galuega e puipuia ai aiga e ala i ni fesoasoani, mo i latou e lē o mafai ona maua ni fesoasoani mai aiga.
