O loo feta’ua’ina le ono iai o suiga i tulaga tofi, a o ta’ita’iga a le Vaega Faaupufai a le National.
Ma o se vaega ua fesiligia ai le lumana’i o le alii Palemia, Christopher Luxon.
I le faatalanoaga a le alii faipule o lea vaega faaupufai, Chris Bishop na fesiligia ai e le ‘aufaasalalau le moni o ia tala feavea’i, mai sui faipule i totonu o le vaega faaupufai, ae tali, e na te lē o tetee i faamatalaga i le talanoa mai o sui o le National Party i sui ‘aufaasalalau, ma ia faapea mai e lē o se taimi muamua foi lea ua iai ni tala feavea’i i le ono iai o ni suiga.
Ma i lona iloa e leai se mea e maua mai ai, ma e lē o iai se faamoemoega i le taunuu o ia faamatalaga.
Na teena foi e le tama’ita’i o Erica Standford ia faamatalaga, ma tala feavea’i ma fuafuaga o le ono avea ai o ia ma ta’ita’i.
Peita’i, ua ta’ua e nisi mai i totonu o le faafaletui a le National, o Bishop ma Stanford o nisi ia o loo feta’ua’ina le ono tauva mo le tulaga tofi o le ta’ita’i.
Faamauina ua leva lava ona iai popolega i le ta’ita’iga a Luxon, e pei foi ona iai nisi o faamatalaga i le sau ai o lenei tausaga, lea na faatautaia ai se palota o le faatuatuaina o le alii Palemia i le masina o Aperila.
O le taunuuga na faatumauina pea lana ta’ita’iga o le vaega faaupufai.
E ui i nei tala feaveai o loo telē le faatuatuaga o Christopher Luxon o loo iai pea le lagolago a lana vaega faaupufai ia te ia.
Puna o Faamatalaga: https://www.nzherald.co.nz/nz/politics/christopher-luxon-leadership-nationals-chris-bishop-speaks-to-media-as-speculation-runs-hot-over-potential-change/53NNVR2OCJDVNIUG27SWWWN5KE/
