O le faailoa ai e le Malo o Samoa e ala i se faai’uga a le Kapeneta i le Aso Lulu o le vaiaso nei e taofia uma le toe ave o se fesoasoani ma le lagolago i le pulega o le Lakapi Samoa, ua ave ai se tuualalo a le pulega o le lakapi i le lalolagi i le malo i se isi avanoa e toe iloilo ai lana faai’uga.
Ua lipotia lea tuualalo a le pulega o le lakapi i le lalolagi ua ave i le malo o Samoa, a o faamae’a i le Aso Faraile o lenei vaiaso le fono a sui o le lakapi i le lalolagi ma sui o iuni lakapi a Tonga, Fiti ma Samoa o loo tau faamautū ai le fuafuaga poo se proposal e tuuina atu i le malo o Ausetalia mo se fesoasoani tupe e 150 miliona tālā e siitia ai le atina’e o le lakapi i le Pasefika.
Ua faailoa e se molimau faatuatuaina o le amatalia ai o ia talanoaga i le Aso Tofi na tuuina atu ai ma le tuualalo mai le pulega o le taaloga i le lalolagi ma o loo tālia nei se finagalo o le malo.
Ae i le faamatalaga faalaua’itele mai le malo ua faailoa ai o le tuana’i o masina sa faia ai feiloa’iga ma feutana’iga sa taumafai ai e soalaupule faafitauli ua ōia ai le lotoifale o le Lakapi Samoa, ua taunuu ai i le faai’uga e faasolomuli fesoasoani uma sa tuuina atu e le malo i le itutino o loo pulea nei le lakapi i le atunuu.
Ua faaalia e le Palemia, susuga Laaulialemalietoa Leuatea Polataivao Fosi i le pepa o faamatalaga, o lea faai’uga ua aveesea ai fesoasoani tau tupe ma isi vaega uma sa maua i le lagolago a le malo i le Lakapi Samoa.
E ui ina faailoa lea finagalo o le malo ae ua faaalia e le Palemia o le a faatumau pea le lagolago lea i le lumana’i i se isi iuni lakapi o le a feagai ma le faatautaia o le taaloga i le atunuu.
Ua laumanu’ia aulape e ono feiloa’i ma le lumana’i o le lakapi i Samoa, o le soloia mo se taimi lē tumau o le toe avea ma sui auai o le taaloga lakapi i le lalolagi, pe a tula’i mai lea tulaga i se taimi i le lumana’i.
Faaalia e se molimau faatuatuaina o sea tulaga pe afai e tula’i mai, o le a noatia ai avanoa uma o Samoa e auai i taaloga faavaomalo e aofia ai ma le Ipu o le Lalolagi i le tausaga fou.
E oo foi i le nofoa ua saofa’i ai Samoa i le Fono Faatonu o le taaloga lakapi a le lalolagi o le a aveesea ma faamuta.
O loo tālia se finagalo o le ta’ita’ifono ma le Komiti Faafoe o le pulega o le Lakapi Samoa.
