Ua taofia mo se taimi lē tumau taaloga lakapi liki a le Tumua Central Sub-League, a o faia ai pea su’esu’ega a leoleo i le māfua’aga o le maliu o se tama lakapi liki i se vevesi na tula’i mai i le taaloga i le va o le ‘aulakapi liki a Malisi ma le Apia Maroons, lea sa faia i le malae lakapi i Vaiala i le Aso Toonai na te’a nei.
Ua faailoa i se pepa o faamatalaga mai le pulega o le taaloga lakapi liki i Samoa ua galulue faatasi uma kalapu o loo aafia e tuuina atu le fesoasoani i le aiga o le tama taalo ua maliu, aemaise o su’esu’ega a leoleo.
Ua tuuina atu foi e le pulega o le lakapi liki a le atunuu le fesoasoani i le aiga o lē ua maliu le susuga Saveatama Rachel Faamavaega.
O loo talosagaina e leoleo le fesoasoani a le atunuu i faamatalaga ma ata video faapea ni ata na pu’e e tuuina atu mo a latou su’esu’ega.
