O taaloga lakapi uma a a’oga i lo tatou atunuu o loo faatautaia e le Matāgaluega o A’oga ma Aganuu ua faasee atu nei i le Iuni Lakapi a Samoa lea sa faalauiloa aloa’ia i le faai’uga o le vaiaso ua mavae.
Ua faailoa lea suiga e le Matāgaluega o A’oga ma Aganuu ma le faamatalaga mai le matāgaluega o le a tulimata’i se faigāpa’aga vavalalata ma lea Iuni Lakapi ma ana paaga uma ina ia mautinoa le sologa lelei o le faatinoina o lea suiga mo le manuia o fanau a’oga, o a’oga ma le lumana’i manuia o le lakapi i Samoa.
I se isi o tala i le taaloga lakapi i le atunuu o le Aso Toona’i nei e faaauau ai le taamilosaga o le Ipu a le Ta’ita’ifono poo le Chairman’s Cup mo le lima ai lenei o vaiaso.
O taaloga o lenei vaiaso o le a tinoū ai ‘au e finau mo le sao atu i semi finals i le faai’uga o le vaiaso a sau.
O le malae lakapi i Tuanaimato i le nofoaga o loo iai le ofisa tutotonu o le pulega o le Lakapi Samoa o le a faagasolo ai taaloga lea o le a fetaui ai:
8:00am – A’ana vs Itu o Tane
10:00am – Safata vs Palauli & Satupaitea
12:00pm – Apia vs Fa’asaleleaga
2:00pm – Siumu vs Aleipata
4:00pm – Falealili vs A’ana West
