Ua faailoa mai e le Ofisa o Fuainumera Faamaumauina a Niu Sila le maualuga o pasene ua oo iai le numera o tagata e lē o iai ni galuega i totonu o Niu Sila, lea ua oo atu nei i le 5.6%, mai le 5.4 sa iai i le kuata ua mavae.
E silia ma le 166 afe tagata ua leai ni galuega, ma e tusa ma le tasi vaelima (1/5) o i latou ua silia ma le tausaga o sa’ili pea ni galuega.
O le vaega o tupulaga talavou e 15 i le 19 tausaga le matutua o loo faamauina le matua’i aafia, ma e faapea ua oo atu le pasene o i latou ua leai ni galuega i le 25.3%, ae mo i latou e i le va o le 20 i le 24 tausaga le matutua o loo faamauina e 12%.
O Northland e maualuga lona fuainumera ma pasene e pei ona iai le 8.8%, sosoo ai ma Aukilani i le 6.5 pasene, ae o Otago ma Canterbury o loo maualalo lea numera.
Peita’i, ua faailoa mai e le ‘ausu’esu’e i tulaga o tamaoaiga e tusa ma le 13,000 galuega fou na faaopoopo i le kuata lenei, ma le talitonuga ua amata ona vaaia le alualu i luma o tulaga o galuega e ui i le iai pea o Niu Sila i taimi faigatā o le taugatā tele o le soifuaga ma le tamaoaiga.
Puna o Faamatalaga: https://www.nzherald.co.nz/business/unemployment-rate-hits-56-worse-than-expectations/ELH5NYG755CINOTCCRVPIWPCMM
