Ua amata aloa’ia le konekarate faapolofesa a le tama’ita’i Samoa o Honey Kerslake, o se alo e faasino i se tasi o tamalii Samoa i Niu Sila nei ta’uta’ua i le taaloga lakapi a le All Blacks, o Jerry Collins ua faaiilagi lana folauga.
Ma o lea konekarate o le Premiership Women’s Rugby, e saofagā atu ai le tama’ita’i mai polokalame e atina’e ai le taaloga lakapi, England’s age-group rugby system.
Ua faamauina i ripoti, o Honey Kerslake, ua 18 tausaga le matua, ma sa taalo i le ‘au a tama’ita’i e i lalo o le 18 tausaga le matutua ma le ‘au e i lalo o le 21 tausaga a Egelani.
Faamatala e Honey, e pei o lona tamā ia Jerry Collins ma ana taumafaiga i le taaloga, e pei na faaosofia ai lona fiafia tele i le taaloga lakapi, ma ua ia faaauauina ai le taleni na iloga ai lona tamā a o soifua mai o ia.
Na maliu Jerry Collins ma lana pa’aga i se faalavelave tau taavale i Farani i le tausaga e 2015.
E 48 taaloga na Collins mo le All Blacks ma o loo manatua pea lea alii o ia o se tasi o tama taalo iloga i le talafaasolopito o le lakapi i Niu Sila.
Na ta’ua foi e Honey le lagolago malosi a lona tinā ia te ia, faamauina le telē o lana fesoasoani i le taumafaiga o lana taleni e ui i le itiiti o avanoa mo tama’ita’i i faaitu na ola mai ai.
Faamanino e Honey o loo iai lona faanaunauga e faaauau le atina’e o lana taleni ina ia tumati’e ana taumafgaiga i Exeter Chiefs ma faaauau pea lona tau’aveina o le taleni a si ona tamā.
