Ua faamaonia mai i ripoti a le leitio faavaomalo a Niu Sila, le iai pea o se tamaitiiti a’oga mai le Auckland Grammar i le falema’i i se tulaga tigāina lava, ona o se faalavelave mata’utia na aafia ai i le ogatotonu o lenei vaiaso.
O lea tamaitiiti a’oga o loo aofia i le numera o ē to’alima na aafia i le Aso Lulu, ina ua soso’a e se taavale na gaoia e se alii.
Ma e faamauina sa alu se toleniga a le latou kalapu uila vilivae ae aafia loa i le taeao o le Aso Lulu.
Faamauina e to’alua nisi o fanau a’oga na aafia, e le’i iai i se tulaga tigāina ae ua na o ni manu’a mitimiti, ma ua te’a i tua mai le falema’i ma toe foi i aiga.
E 49 tausaga o lē o loo tuua’ia nei, o le mea mata’utia i lea matāupu ua faaalia, e lē gata ina aafia ia fanau a’oga, ae sa ia faaoolima i se tasi o tagata na alu mo sana tamo’ega, taumafai e ave faagaoi se isi taavale, ma lona tapē ai se’i tulou o se ta’ifau.
Māua e 17 moliaga ua molia ai nei o ia.
O loo taofia pea lea alii i le Falema’i i Aukilani i lalo o le vaavaaiga a leoleo ona o tulaga tau le soifua mālōlōinā.
O loo taofia i le taimi nei le faalauiloa faalaua’itele o le igoa o lea aii.
O le Aso Tofi na fuafua e tula’i ai i luma o le faamasinoga peita’i e le’i iai ae na talosagaina e lana loia nai aso se’i talanoa atu ai i lē ua molia, ma o le vaiaso fou lea ua faamauina e toe valaau ai lana matāupu ma o le a faaaogā auala o fesoota’iga faaneionapo (audio-visual link).
Puna o Faamatalaga: https://www.rnz.co.nz/news/crime-and-justice/923911/high-school-student-remains-in-critical-condition-following-violent-attacks-in-auckland-s-epsom
