I le to’aselau tagata ua lesitala suafa mo le tuuga o le malafoni lona valu e faia i le faai’uga o le vaiaso nei.
O le 55 pasene o lea aofa’iga o tagata taufetuli o sui o atunuu i fafo e pei o Saina, Iapani, Amerika, Italia, Ausetalia ma Niu Sila, Fiti ma Amerika Samoa.
Ua faailoa e le susuga Seti Afoa o loo taulamua i le tapenaina o le malafoni, o nisi o le a auai sa taufetuli i le malafoni sa faia i Amerika Samoa i le faai’uga o le vaiaso na te’a nei, ma ua malaga mai i Samoa mo le malafoni lona valu, ma o nisi o le faalua lea ona malaga mai i Samoa e auai.
O le Aso Toona’i nei lea faamoemoe e pei vaevaeina i ni vaega se 4.
O le malafoni autū e amata i Manono uta i le tasi i le vaveao, malafoni ua ta’ua o le half marathon e amata mai Faleasiu, o le isi vaega e amata mai Faleula, o le isi vaega e amata mai Vaitele Tai ma le malafoni e 3 kilomita le mamao e amata i Vailoa Faleata ma e tini uma i le Maota o le Malo i le eleele fou.
