O loo faagasolo i le vaiaso nei se sa’ili’iliga a sui o se auaunaga faavaomalo mo le siitia o faiga faatemokarasi e faatautaia ai faigāpalota, le International Institute for Democracy and Electoral Assistance poo le International IDEA.
O se feiloa’iga ma sui o loo faatautaia lea sa’ili’iliga ua faailoa ai le tāua tele o le sa’ilia o finagalo o tagata lautele ma sa’ili ni o latou lagona pe o se faiga ua tatau ma talafeagai, ae poo ā ni ona itu lelei ma itu lē lelei, ma le tasi o itu tāua poo ā ni faiga ma auala e malupuipuia ai mai ni faaletonu e ono tula’i mai.
O le faaaogāina o ia auala o fesoota’iga faatekonolosi e palota mai ai i fafo tagatānuu o Samoa e agavaa i le sa’iliga o sui o itumalo i le Palemene, o se galuega o loo faatalatalanoa ma le fuafuaga o se taunuuga o sa’ili’iliga o loo faia o le a tuuina atu i le Kapeneta mo se faai’uga mulimuli.
Ua faaalia e ia sui o loo faia le sa’ili’iliga e iai atunuu ua latou faaaogāina.
O le Aso Lulu le ogatotonu o lenei vaiaso ua tāloina ai se feiloa’iga a sui o loo i totonu o le faaamalu o faalapotopotoga tuma’oti uma i Samoa le SUNGO ma sui o loo faatinoina le sa’ili’iliga poo se feasibility study.
O le Aso Lua sa feiloa’i ai ma sui o vaega faaupufai o le Samoa Ua Potopoto, Vaega e Puipuia Aiā Tatau a Tagata ma le pati o le Faatuatua i le Atua Samoa ua Tasi.
