Ua faamaonia ma o le a tapena nei le Lakapi Liki a Ausetalia e aumai i Niu Sila le taaloga o le State of Origin ma o le a faatautaia mo le ulua’i taimi i totonu o Aotearoa nei.
Ua faamaonia o le taaloga lona lua o le faasologa o taamilosaga a alii i le tausaga fou e 2027, o le a faia i Eden Park i Aukilani i le Aso Lulu, 16 Iuni 2027.
Faamauina o lea ua fuafua le NRL e faatino polokalame mo le vaiaso atoa i le aga atu ai i le taaloga i Eden Park, ma o le a aofia ai se taaloga a le New Zealand Warriors i le Aso Sa a o le’i fetaui le Queensland Maroons ma le NSW Blues.
Na saunoa le pule o le NRL, Peter V’landys, o le State of Origin e ese lava tulaga o faatino ai o lea taaloga mai isi o taaloga i Ausetalia ma ua to’atele tagata mai isi o atunuu ua molimauina le fiafia tele i lea taamilosaga o le Lakapi Liki.
Ta’ua e tusa ma le 50,000 tagata e mafai ona ofi i Eden Park, ma o loo faamoemoe e lolofi mai ai tagata e mulimulita’ia lea taaloga mai Ausetalia, Niu Sila nei ma atunuu i fafo.
Comments
Loading comments…