O le faamanatuina i le vaiaso ua mavae o le Iupeli Auro poo le limasefulu tausaga talu ona faatūina le sosaiete a loia i Samoa, ua aloa’ia ai le tautua matavela ma le sao tāua o ona sui auai e to’asefulu.
O nisi ua leva tausaga o avea ma loia ae o nisi o loo galulue i tofiga Faamasino ae o nisi sa auauna ma tautua i lea tofiga ua fai i lagi le folauga.
O le afioga Patu Tiavaasu’e Falefatu Maka Sapolu sa avea ma Faamasino Sili, o le afioga Vui Clarence Nelson ua mālōlō litaea mai le tofiga Faamasino ae ua avea nei ma Komesina o Sulufa’iga, o le tama’ita’i Faamasino le afioga Leutele Niavā Mata Tuatagaloa ua avea nei ma faamasino sinia o le Faamasinoga Maualuga, ma le afioga Lesatele Rapi Vaai sa galue i le faamasinoga maualuga ae ua ia tauave nei le tofiga o le Pelesetene o le Faamasinoga o Fanua ma Suafa.
Ua amana’ia foi i le faailoga taualoa o le Iupeli Auro o le Sosaiete a Loia i Samoa ona sui auai sa tauaveina le tofiga Loia Sili a le malo o le afioga Taulapapa Brenda Heather Latu ma le afioga Tuatagaloa Aumua Ming Leung Wai, faapea le tofa Tuiloma Neroni Slade sa avea o se Faamasino o le Faamasinoga o Soligatulafono a le Lalolagi ae sa ia tauave foi le tofiga o le faauluuluga o le ofisa o malo o le Pasefika le Pacific Islands Forum Secretariat o loo i Suva i Fiti.
O isi sui ua maua lea faailoga taualoa o loo tautua pea i le tomai faaloia ma sa lotolotoi i le amataga o le sosaiete e pei o le tama’ita’i loia sinia o Ruby Drake ma Desmond Herman Kruse.
O le afioga Luamanuvao Katalaina Sapolu e atoa iai le sefulu o sui o le sosaiete ua tauaao iai le faailoga taualoa o le 50 tausaga o le sosaiete sa avea ma uluai tama’ita’i loia na filifilia e avea ma Komesina o Sulufa’iga, ma faamavae ai mai lea tofiga ae toe taliu i Peletania o loo faamautū ai ma lona aiga.
