A o lumana’i ai nei le isi lua vaiaso o le masina o Aokuso taunuu i le Aso Sa 30 o lenei lava masina e amata ai polokalame o le vaiaso o Measina poo le Measina Festival, ua faailoa i fesoota’iga i upega tafa’ilagi le faamautū o le malaga mai i Samoa o le aumalaga o se ‘ausiva to’atele mai le aai o Melepone i le setete o Vitoria i Ausetalia e faafiafia ma faia a latou faaaliga i le vaiaso o le Measina.
Ua faaigoaina lea ausiva o le LetTeine Polynesian Academy dance group o nisi o alo ma fanau a Samoa.
O se tasi lea o autū o lea vaiaso o le avanoa e malaga mai ai o tatou tagata o faamautū ma alala i fafo e molimauina polokalame o siva ma pese faaleaganuu ma isi polokalame ma avanoa ai foi alo ma fanau sa soifua ma ola a’e i fafo e silasila ia tatou tu ma aganuu ma lona faatinoga i Samoa.
E lua ni faafiafiaga a lea ‘ausiva o le a faia i le taimi o le Measina Festival ma o loo lagolagoina e nisi o pisinisi i lo tatou atunuu.
O tausaga ua mavae i le vaiaso o le Teuila lea ua suia nei lona igoa sa malaga mai ai foi ‘ausiva mai fafo e faafiafia ma faailoa atu i le atunuu e ui o loo aumau i fafo ae o loo latou faaolaola pea a tatou pese ma siva faasamoa.
O loo iai le faamoemoe o le ‘ausiva mai Melepone i Ausetalia e feiloa’i atu i nisi o auaunaga tuma’oti i Samoa ma faatino ai foi ni foa’i mo ia auaunaga e pei o le sosaiete o le kanesa ma le faalapotopotoga faavae o le gasegase o fatuga’o.
