O le South Pacific Tuna Treaty lea foi e faaigoa o le US Tuna Treaty e tumau pea ona avea o se faiga faapaaga tāua e pei ona saunoa iai le Pacific Island Forum Fisheries Agency poo le FFA.
O le matāfaioi a le auaunaga lea o le puleaina ma le faatonutonuina o le fagotaina o le tuna i totonu o le sone e 200 maila mai atunuu e 17 o loo auai i lea maliega.
Fai mai le faatonu aoao o le FFA, Noan David Pakop o le maliega lea ua faataga ai ona maua e Atumotu o le Pasefika fesoasoani tau tupe lea e aogā tele pe afai e faaaogā tatau i gaioiga tau faigāfaiva i Atumotu.
Faailoa e le RNZ e 60 miliona tālā Amerika le foa’i a le malo o Amerika mo le faaauauina o lea taumafaiga mo le faigā faapaaga i le va o Amerika ma atunuu o le Pasefika.
O se tasi lenei o maliega aupito umi i le itu tau faigā faiva ma o se avanoa lelei e faamalosia ai le galulue faatasi o le Malo tele ma atunuu o le Pasefika.
Puna o Faamatalaga: https://www.rnz.co.nz/news/pacific/881722/regional-fisheries-agency-says-us-pacific-tuna-treaty-vital-as-it-delivers-us-50-million-boost
