Ua fautuaina nei e leoleo ave taavale uma i faaitu o Dunedin ina ia ‘alofia le soona feoa’i i luga o auala talu ai le tetele mai o aafiaga i le to’ulu o le kiona; ua maseesee auala ma ua tauāu ina lē saogalemu ai mo feoa’iga o taavale.
Ae faamauina se’ia vaganā ai o se mea e tatau ai lava ona aga’i iai ona feoa’i lea, ae ia mālōlō lelei mai le aga’i i luga o auala i lenei taimi.
Ua tapunia nisi o aualatele e aofia ai le State Highway 1 i le va o Dunedin ma Waitati, faapea ma le State Highway 87 i le va o Outram ma Middlemarch.
Ua tapunia foi a’oga tulagalua ma a’oga amata i le itumalo o Dunedin mo le asō, ae na faatuai ona amata a’oga maualuluga i le taeao analeila, talu ai aafiaga o iai auala ona o le kiona.
I ripoti mai le NZ Herald o lea foi na faalēaogāina ni faigāmalaga a vaa la’upasese o le Interislander i le va o Ueligitone ma Picton ona o galu maualuluga ma matagi malolosi.
Ua fautuaina e le Bluebridge e ono tuai pe faalēaogāina foi nisi o ana malaga pe a faaauau pea ona faaletonu tulaga o iai le tau, aemaise o le sou tele o le sami ma galu maualuluga e fafati mai.
Ua talosagaina e auaunaga o faalavelave tutupu faafuase’i tagata lautele ina ia māta’itūina lelei faamatalaga ma le feoa’i atu i faaitu o loo aafia, o manumanuga lava ina ne’i aafia se soifua ona o tulaga loulouā o le tau.
Puna o Faamatalaga: https://www.nzherald.co.nz/nz/auckland/polar-blast-brings-low-level-snow-road-warnings-and-ferry-cancellations/23C2ZZVE5RHLBFITLS2HJKAQSY/
