O le faaaogāina e le Faufautua Sinia a le Palemia o se taavale a le pulega o fela’ua’iga i luga o le laueleele le Land Transport Authority e pei ona tauave ai le numela o se private number plate e pei o numela o taavale a le atunuu lautele, ae lē o se numela ua iai ma mata’itusi o le L.T.A., o se suiga na faia i se faatonuga mai le Palemia o loo tauaveina le tofi Minisita o Galuega Tetele e aofia ai ma le pulega o fela’ua’iga i luga o le laueleele.
Ua faailoa mai lea tulaga e lea pulega e faamalamalama ai se lipoti a le nusipepa o le Samoa Observer na faailoa ai lea suiga ina ua molimauina, o lea taavale o se pikiapu sa faaaogā e lē sa avea ma minisita o lea auaunaga a le malo ma sa tauave ai le numela poo le number plate a le pulega o fela’ua’iga i luga o le laueleele.
Ua faaalia e le L.T.A. le Land Transport Authority o loo i le Palemia le faitalia e faia ai lea suiga i lona tulaga o le minisita o loo vaaia le pulega, ma o lea fo’i faitalia e avanoa ai le Palemia na te faia se suiga pe a iai ni tulaga e mana’omia ai le puipuiga ma le saogalemu o lana Faufautua Sinia.
Sa faailoa e le nusipepa i lana lipoti e pei ona māfua ai le faamatalaga faalaua’itele mai lea pulega a le malo, o le Faufautua Sinia o le tofa Apulu Lance Polu.
E pei ona silafia o le Matāgaluega o Tupe a le malo o loo iai le vaaia o taavale uma a le malo lea o loo faamalosia fo’i e lea matāgaluega ta’iala mo le faaaogāina o ia aseta tāua.
