O le filifilia ai o le faauluuluga o le Faalapotopotoga o loo atina’eina le taaloga siisii u’amea mamafa a Samoa e avea ma Peresetene o lea taaloga mo atunuu o Malo o le Taupulega, ua faailoa ai e le afioga Tuaopepe Jerry Wallwork i le lipoti a le Samoa Global News, le faamautū le talimalo o le tatou atunuu i le taamilosaga sa’ili siamupini a Malo o le Taupulega i le siisii u’amea mamafa ia Mati o le tausaga fou 2027.
O se taamilosaga tāua tele auā o le a avea foi ma avanoa e sa’ili ai tagata taaalo o lea taaloga e agavaa mo taaloga a le Olimipeka a le lalolagi i le tausaga e 2028 lea e faia i Los Angeles i Amerika.
Ua faailoa ai foi e le Peresetene o taaloga siisii u’amea mamafa a lo tatou atunuu o lea tausinioga i le tausaga fou o le a faailoga ai i Samoa ma le atoaga o le 80 tausaga o le taamilosaga sa’ili siamupini i le siisii u’amea mamafa a Malo o le Taupulega.
O taaloga talu ai nei a atunuu o Malo o le Taupulega sa faia i le aai o Glasgow i Sikotilani, e lua pine a Samoa na maua ai, o le auro ma le siliva mai le taaloga siisii u’amea mamafa.
