Ua pu’eina ma taofia e leoleo se alii 49 tausaga le matua mai nuu o Saleapaga ma Aua i Amerika Samoa, ma ua molia i lona faia o ni tala tau faamata’u i luga o auala o fesoota’iga le api o foliga poo le facebook, ma ia faailoa ai se gaioiga e faaoo ai le oti poo le maliu i le ta’ita’i o le malo le afioga i le Palemia susuga Laaulialemalietoa Leuatea Polataivao Fosi.
Ua faailoa i faamaumauga a leoleo ua tuuina atu ai i le faamasinoga le moliaga o Aumaga Aloalii, o le va o le aso muamua ma le aso 16 o le masina o Aokuso na tuuina atu ai e lea taule’ale’a lana tusitusiga i le api o foliga ma ia faailoa ai lona faaoo o le maliu i le Palemia e faaaogā ai se laau malosi, pe a toe oo atu i Saleapaga.
O ia faamatalaga ua solia ai e Aumaga Aloalii e 49 tausaga le matua o Saleapaga ma Aua o Amerika Samoa, le Vaega 188 Puipui (b) o le tulafono o soligatulafono poo le Crimes Act o le tausaga e 2013.
A o nofo taofia ai lea tagata i le vaaiga a leoleo i le falepuipui i Tanumalala, ua faatulaga le aso muamua o le masina fou o Setema e tula’i ai i le Faamasinoga Maualuga mo le ulua’i valaauga o lona moliaga.
