Ua laumanu’ia nei le tapena ai o se iloiloga faalotoifale i le tulaga o loo taoto ai le pulega o le Lakapi Samoa, ae see faa’autafa le ta’ita’ifono ma le Komiti Faafoe o le pulega o le taaloga lakapi i le atunuu.
Ua laumanu’ia foi le filifilia e le lakapi o le lalolagi o ni sui mo se Komiti Faafoe lē tumau poo se interim board latou te faaauau le faafoeina o galuega o le pulea o le taaloga a o faia lea iloiloga ma faatali se taunuuga o lea galuega.
E le’i manuia sa’iliga i se finagalo o le ta’ita’ifono o le Komiti Faafoe, ae ua faailoa mai e se molimau faatuatuaina o le ta’otoga lea na taunuu iai feutana’iga ma sui o le lakapi o le lalolagi sa i Samoa i le faai’uga o le vaiaso ua mavae.
A o tapena ai ia fuafuaga e sa’ili ai se fofō i le fetuleia’i ma le fefulituaa’i ua aafia ai le taaloga lakapi i Samoa ma taunuu i le lē toe amana’ia e le malo o le pulega o iai nei ma faasolomuli ai ma le toe tuuina atu iai o ni fesoasoani tau tupe, o le faai’uga o le vaiaso na faalauiloa ai le iuni lakapi fou lea ua faaigoa o le Samoa Rugby Football Union.
O nisi o tamālii sa i totonu o le Manu Samoa ma avea ai ma sui o le Komiti Faafoe o le Lakapi Samoa aemaise nisi o tama lakapi sa lauiloa ai le Manu Samoa i tausaga ua mavae ua lagolagoina le fausia o lea iuni lakapi.
