E toaono tagata sa i luga o se vaa sa tau sāilia i ogasami o Fiti ma ua maua uma i latou e le vaalele o vaega’au a Niu Sila, le Air Force. O se tala fiafia le maua atu o loo saogalemu uma i latou.
Ta’ua i lipoti a le RNZ Pacific o i latou ia e toaono na agai ese mai i le vaa lea mai Namuka Island e agai i Fulaga i le Lau Group i le taeao o le Aso Tofi talu ai, peitai e le’i taunuu i le vaega sa faamoemoe e malaga iai.
Faia ai loa suesuega ma iloa ai i le afiafi o le Aso Faraile talu ai o loo i le itu i saute i sisifo o Vanuavatu.
Faigata galuega laveai ona o le sou o le sami, na avatu uma i latou ia i le falemai mo siaki a o lei faamatuu atu i o latou aiga.
Ua tuuina foi le lapataiga i tagata ia faaeteete le agai i le gataifale, ma ia siaki foi tulaga ole tau a o lei tuuvaa atu aemaise lava pe afai e iai ni lapataiga i le tau e ao lava ona utagia.
Puna o Faamatalaga:https://www.rnz.co.nz/news/pacific/949812/missing-boat-with-six-aboard-found-by-nz-air-force-plane
