Fai mai e 8 lelei itula o loka pe tapunia e leoleo se taulaga i Kuiniselani i Ausetalia ona o se faalavelave na tula’i mai ai.
Na maua ai tino maliliu o se alii ma se tama’ita’i ma’itaga i se fale na tupu ai le faalavelave.
Ta’ua e le 9News na valaau ane le fesoasoani faavavave i se tuātusi i King St i Charleville i Kuiniselani i le itu i Saute i Sisifo o le setete ona o lipoti o se faaoogalima i le afiafi ananafi.
Sa faia le faaaliga a leoleo i le afiafi lava ananafi ina ia tapunia atoa lea nofoaga a o faia feutana’iga ma su’esu’ega.
O lipoti lata mai i le asō ua faailoa ai e 45 tausaga le matua o le alii ma le tama’ita’i e 23 tausaga le matua lea ua maliliu.
E le’i afaina se isi tagata poo leoleo foi sa auai i le matāupu lea anapo ae o se tamaitiiti na ave i le falema’i ma e lē o afaina foi.
O loo faaauau le su’esu’ega a leoleo ma le faamatalaga se’i mae’a ona toe faailoa mai lea o nisi faamatalaga faaopoopo e tusa o lenei faalavelave.
Puna o Faamatalaga: https://www.nine.com.au/australia-news/qld/two-bodies-found-in-rural-queensland-home-after-hours-long-stand-off-20260806-p60lu7.html
