E silia i le 100 fale ua tafiesea mai o latou faavae i le motu tele poo le Big Island i Hawaii ona o le afā malosi o Lala o loo aafia ai.
Ua faailoa e le Kovana o Hawaii, Josh Green i le BBC, e silia i le 200 afe fale o loo motusia mai ai le eletise ma e ui ua faasolo ina vaivai le malosi o le afā i le taimi nei ae o loo iai pea i le itu i Saute o le motu ma o loo lamatia ai pea soifua.
O loo fautuaina foi i lōlōga faafuase’i ma o ananafi na matua’i malolosi ai matagi.
O loo tumau pea la lapata’iga o le afā mo motu uma e 8 o Hawaii ae o le itu e faafetai ai le to’atele ona o le leai o se soifua e ma’umau pe aafia i fale na faaleagaina.
Pe ā ma le 180 sui o le National Guard na ave ane e fesoasoani i le valaau mo fesoasoani faavavave.
E tolu falema’i ua lipotia o loo motusia ai le eletise ma o loo faaaogā afi faaleoleo ae sa tapunia lē tumau malae vaalele tetele i Hilo ma Kona ma ua toe tatala i le taimi nei.
Faailoa e le Kovana e 190 faigāmalaga na faalēaogāina i le taimi ua aafia ai le atunuu i le afā ma e iai vaega ua motusia ai foi le sapalai o le suāvai.
O le afā o Iniki i le 1992 o le afā malosi mulimuli lea na aafia ai Hawaii ma sa faamauina i le Vaega 4 lona malosi, ua maliliu ai tagata e to’a 6 ma le 3 piliona o le tau o mea na faaleagaina.
Puna o Faamatalaga: https://www.bbc.com/news/articles/crmrr7kjy9vo
